CENTRAL VISAYAS- Nakatala ang Central Visayas og 225 ka bag-ong kaso sa Human immunodeficiency virus (HIV) sa unang quarter sa 2025, nga nagbutang niini sa nag-unang unom ka rehiyon nga adunay pinakataas nga ihap sa mga impeksyon sa tibuok nasud, sumala sa Department of Health.
Sa mga nga datos, mas daghang batan-on sa dakbayan sa Sugbo ang nasuta nga adunay HIV, usa ka kalamboan nga nakapabalaka sa mga opisyal sa panglawas.
Sa unang quarter karong tuiga, ang dakbayan sa Sugbo nakatala og kinatibuk-ang 101 ka bag-ong kaso sa HIV.
Matud ni Dr. Kimberly Mae Sanchez, Cebu City Health,Department Social Hygiene Physician, niadtong Marso lamang, ang mga healthcare workers nakatala ug labing menos 63 ka mga tawo nga adunay HIV (PLHIV) sa siyudad.
Gidugang niini, nga gawas sa nagkadaghang bag-ong kaso, ang mga opisyal sa panglawas sa dakbayan sa Sugbo nipadayag og kabalaka sa pagtumaw sa laing makatugaw nga trend.
Kana gumikan kay ang mga pasyente nga adunay HIV nagkabata.
Matod ni Sanchez, ilang naobserbahan nga kasagaran sa mga bag-ong nadayagnos nagpangedaron og 15 ug 34 anyos.
Gidugang niini, nga ang mga pasyente sa HIV nga nag-edad 15 hangtod 24 anyos naglangkob sa halos 27 porsyento sa gidaghanon sa mga bag-ong kaso.
Nasuta nga ang unprotected sex nagpabilin nga dominanteng paagi sa pagpasa sa HIV sa dakbayan sa Sugbo, gisundan sa mga mabdos nga inahan nga nagpasa sa impeksyon sa ilang mga anak.
