CEBU CITY – Gi-dismiss sa City Prosecutor ang kasong “libel” nga giatubang sa duha ka mga anchor sa Bombo Radyo Cebu nga silang Bombo Jun Salde ug Bombo Marco Lucabon.
Base kini sa Resolution nga gipagawas sa City Prosecutor diin nagkanayun kini nga i-dismiss ang duha ka counts sa libel case nga gipasaka sa Incumbent Brgy. Mambaling Captain sa dakbayan sa Sugbo nga si Atty. Gines Abellana tungod kini sa ‘libelous commentaries’ sa duha ka mga anchors niadtung May 2020.
Subay kini sa pag-kwestiyon sa mga Anchor sa hinay nga pagpang-apod apod sa bugas ug foods packs alang sa mga residente sa Brgy. Mambaling human nga gipaubos kini sa lockdown tungod sa pag-ulbo sa COVID-19 niadtung 2020.
Pasangil sa kapitan nga gumikan sa komentaryo nilang Bombo Jun ug Bombo Marco kay gituyo nga dauton ang iyahang ngalan ug pakauwawan sa kahanginan diin dugang pa ni Abellana nga gitawag pa kini sa duha ka anchor nga “OPLOK, GI-ANGO-ANGO, KUWANGGOL, BUANG, ug BOGO”.
Depensa pa nilang Bombo Jun ug Bombo Marco nga sa wala pa niini kay nakadawat na sila og mga reklamo gikan sa residente nga ni-angkon nga pakyas ang ilahang kapitan sa pagpang apod-apod sa mas paspas ug hapsay nga paagi sa mga financial ug rice subsidy.
Sa nahimong desisyon sa City Prosecutor kay gihimug-atan niini nga “No sufficient grounds” nga pasakaan og kasong kalapasan sa Sec. 6 (F) sa Republic Act No. 11469 ang mga respondent nga silang Bombo Jun Salde ug Bombo Marco Lucabon.
Dugang pa sa prosecutor nga ang complainant nga si Atty. Abellana nga kulangan kini og ebidensya ilabi na sa “Recordings” sa giingong ‘libelous commentaries’ sa duha ka anchors.
Tungod niini, nadesisyunan sa prosecutor nga i-dismiss ang kaso nga gipasaka sa kapitan sa Brgy. Mambaling.
