CEBU CITY-Mapasaka na ang kaso Murder karung adlawa Biyernes, Agosto 18 batok kang Simeon Gabutero Jr. ang mamumuno sa pagpatay sa biktima nga si Reah Mae Tocmo, kinsa nakit-an nga gihigot ug gisulod sa usa ka karton.
Kini ang gibutyag ni Police Major Angelito Valleser, hepe sa Labangon Police Station, subay sa pag-angkon sa 22 anyos nga construction worker sa pagpatay kang Tocmo, kinsa iyang giangkon nga iyang hinigugma, tungod sa selos sulod sa iyang boarding house niadtong buntag sa Hulyo 16, 2023.
Nakuha sa mga imbestigador sa kaso ang nagkadaiyang ebidensya nga nagpakita nga si Gabutero ang responsable sa kamatayon ni Reah Mae ug gipresentar kini sa pamilya sa biktima niadtong Martes, Agosto 15 atol sa ilang pagbisita sa estasyonan.
Ang amahan ug mga igsuong babaye ni Reah Mae Tocmo nianhi sa Sugbo aron tan-awon sa ilang kaugalingon ang mga ebidensiya ug dayon gikompronta si Gabutero.
Sa samang adlaw, ang amahan nga si Romeo Tocmo, nibarog isip reklamante ug nipirma sa affidavit batok kang Gabutero.
Dugang ni Valleser nga anaa na sila sa proseso sa pagkuha sa pipila ka mga dokumento nga gikinahanglan sa kaso kagahapong adlawa.
Gitino usab sa opisyal, nga ang 15 anyos nga igsuon ni Gabutero, kinsa niangkon nga mitabang sa iyang igsuon sa paglabay sa kahon nga gisudlan sa lawas ni Reah Mae, nihimo sa iyang kaugalingong extrajudicial confession niadtong Miyerkules, Agosto 16.
Sa laing bahin, ang inahan ni Gabutero gikatakdang mosumiter sa iyang kaugalingong extrajudicial confession gahapong adlawa Huwebes, Agosto 17.
