Kusganong mihimakak si Nicholas Kaufman, ang lead defense counsel ni kanhi Presidente Rodrigo Duterte sa International Criminal Court (ICC), ang mga pasangil batok kaniya bahin sa giingong mga paglapas sa ethical standards sa korte.
Sa iyang pamahayag, gipasiugda ni Kaufman nga wala siyay gilapas nga ethical obligations sa ICC.
Sumala niya, ang mga pagsaway ni ICC Presiding Judge Joanna Korner dili usa ka indikasyon sa usa ka paglapas, apan kabahin lamang sa iyang gitawag nga “judicial sensitivity.”
Una niini, gipaambit ni Judge Korner nga ang trial ni Duterte dili angay nga desisyonan sa “court of public opinion.” Gitawag usab niya ang nangaging mga pahayag ni Kaufman sa media nga “inappropriate.”
Bisan pa, giinsistir sa abogado nga ang tanan niyang mga aksyon hugot nga gibasi sa ICC code of conduct, ug nga wala siyay gilapas nga bisan unsang mga lagda sa iyang papel isip abogado.
