CEBU CITY-Nagmalampuson ang gipahigayon nga Kick-Off Ceremony sa Bureau of Fire Protection sa Rehiyon 7 alang sa Fire Prevention Month 2024 gahapong adlawa, Marso 1, 2024 ubos sa tema nga ‘sa paglikay sa sunog, wala ka nag-inusara’.
Kung diin gipasiugdahan sa mga fire truck sa Cebu City Fire Stations ang motorkada, ingon man ang BFP sa Mandaue City Fire Station nga nagpahigayun ug Simultaneous Sounding of Sirens and Honking of Horns.
Matud pa ni SFO2 Wendell Villanueva, ang tigpamaba sa Cebu City Fire Office nga human sa misa ug sa motorkada, gisundan kini og mubo nga programa nga gisalmutan ni konsehal Philip Zafra ingon man ang presensya ni Harold Alcontin, ang OIC sa CCDRRMO.
Dugang pa sa opisyal nga mihatag og makapadasig nga pulong si konsehal Zafra kabahin sa kamahinungdanon sa paglikay sa sunog ug sa panginahanglan sa mga proactive nga lakang aron masiguro ang kaluwasan sa atong komunidad.
Ug ang kamahinungdanon sa pagpalig-on sa matag barangay nga makatukod og kaugalingong Fire Volunteers Brigade nga andam suportahan sa buhatan sa Cebu City Fire Office.
