CEBU – Gumikan sa padayon nga hulga sa African swine fever (ASF) sa industriya sa baboy sa nasod, gusto sa usa ka konsehal sa dakbayan sa Sugbo nga mo-supply og baboy ang mga lokal nga breeder sa ubang mga probinsiya sa nasod.
Niawhag si Konsehal Pastor “Jun” Alcover sa City Government sa paghatag og dugang suporta sa local swine industry pinaagi sa Swine Dispersal Program sa City Agriculture Department.
Sa iyang privilege speech atol sa regular session sa konseho niadtong Huwebes, Disyembre 1, 2022, si Alcover niingon nga ang Cebu City nagpabilin nga anaa sa “green zone,” o wala maapektuhan sa ASF.
Sa gipaabot nga pagsaka sa panginahanglan sa mga produkto sa baboy karong kapaskuhan, kini mahimong dugang nga ekonomikanhong oportunidad alang sa mga lokal nga breeder.
Base sa report niadtong Oktubre 21 sa Bureau of Animal Industry, aduna nay ASF ang siyam ka rehiyon sa Nasud, 17 ka probinsiya, 26 ka lungsod ug 63 ka barangay.
