Gikwestiyon ni Polytechnic University of the Philippines professor ug Kontra Daya convenor Danilo Arao ang kalidad sa gipagawas nga giingong exposé sa PGMN o Peanut Gallery Media Network kabahin kang former House Speaker Martin Romualdez, ug giingong dili kini angay ilhon isip usa ka “investigative journalism piece.”
Sa pakighinabi sa Bombo News Team, giingon ni Arao nga dili patas alang sa mga lehitimong investigative journalists ang paggamit sa maong termino kon kulang sa beripikasyon, dokumentadong ebidensya, ug lawom nga pagsusisa ang usa ka report.
Matod niya, mas nagpunting ang maong video sa dramatikong storytelling ug narration kaysa sa pagpresentar og bag-ong impormasyon nga napamatud-an pinaagi sa independent verification.
Gipasabot usab sa propesor nga dili igo ang paglatid lamang og mga alegasyon ug personal nga interpretasyon aron matawag nga investigative report, ilabi na nga wala pa’y pinal nga resulta ang imbestigasyon sa National Bureau of Investigation o NBI.
Matod ni Arao, dili kini matawag nga investigative journalism kay dili kini patas sa tinuod nga mga tigbalita nga kabalo mo-fact-check ug mo-analyze sa impormasyon.
Dugang pa niya, ang usa ka tinuod nga investigative report kinahanglan adunay bag-ong impormasyon nga wala pa nahibaw-an sa publiko o, kon dili man bag-o, kinahanglan adunay mas lalom ug kritikal nga pag-analisa nga adunay lig-ong basehan.
Gipasiugda usab ni Arao nga dili mahimong mosalig lamang sa taas nga video presentation, graphics, o dramatikong execution aron mahimong credible ang usa ka exposé.
Dugang niya,kon adunay pasangil sa korapsyon o anomaliya, kinahanglan kini suportahan sa klaro ug lig-ong ebidensya, dili lang mga istorya o pangagpas.
Sa katapusan, gipasiugda ni Arao ang importansya sa responsableng journalism ilabina sa panahon sa social media ug digital platforms diin paspas ang pagkatag sa impormasyon.
