CEBU CITY- Nagpasaka og reklamo ang election watchdog nga Kontra Daya sa Commission on Elections (Comelec) batok kang Pres. Ferdinand Marcos Jr. ug Vice President Sara Duterte tungod sa giingong ilegal nga pagdawat og campaign donations gikan sa mga government contractors.
Sa pakighinabi sa Bombo Radyo Cebu, giingon ni Professor Danilo Arao, convenor sa grupo, nga base sa ilang imbestigasyon, kapin ₱20 milyon ang giingong nadawat nga donasyon sa matag usa gikan sa mga kumpanyang adunay kontrata sa gobyerno.
Gipasabot ni Arao nga supak kini sa Omnibus Election Code, nga nagdili sa mga government contractors sa paghatag og donasyon sa mga kandidato tungod sa posibleng conflict of interest.
Gibutyag usab sa grupo nga miagi og hugot nga panukiduki ang ilang reklamo, lakip ang pagkuha og mga dokumento gikan sa Securities and Exchange Commission ug pagsusi sa mga report sa Philippine Center for Investigative Journalism.
Bisan pa og dugay ang proseso sukad pa sa 2022 elections, giingon sa Kontra Daya nga importante nga mapanubag ang mga posibleng nakalapas sa balaod aron mapreserbar ang integridad sa eleksyon.
Dugang pa ni Arao, dugay na kining isyuha apan karon mas gipakusgan ang pagbantay sa mga watchdog groups, ug gilauman nga mosulod kini sa legal nga proseso aron matino kung adunay lig-on nga basehan ang mga alegasyon.
