CEBU CITY- Gilaslas sa usa ka lalaki ang liog sa iyang kapuyo tungod sa kasuko kay gidid-an kini sa pagbalik sa Siquijor.
Kini ang pahayag sa usa ka 24-anyos nga lalaki, dihang gipangutana sa Bombo Newsteam bahin sa iyang rason sa paglaslas sa liog sa iyang hinigugma kagahapon sa hapon, Mayo 30, 2025, sa Brgy. San Nicolas Proper, Cebu City.
Ang biktima nga giila nga si Rona Tica, 26 anyos, ug residente sa susamang dapit, nakaangkon og samad sa liog gumikan sa insidente ug anaa na sa estable nga kondisyon human gihatod sa tambalanan.
Samtang ang suspek nga giilang si Mark Bryan Oliveros, 24 anyos, usa ka fish vendor, ug lumad nga taga Larena, Siquijor, daling nasikop sa mga otoridad human sa insidente.
Nasuta nga lima na ka tuig nga nag-uban silang Oliveros ug Tica ug aduna na silay usa ka anak.
Giangkon ni Oliveros nga kanunay silang mag-away sa iyang live-in partner tungod sa selos, apan nisamot kini dihang mianhi sila sa Sugbo aron magpatambal sa iyahang wala nga kamot tungod sa bali.
Gusto na unta niyang mobalik sa Siquijor apan gipugngan siya sa iyang ka-ipon hinungdan nga nasuko siya pag-ayo ug misuway kini sa pagpatay sa iyang niini.
Gisuwayan usab niya pagpatay ang ilang anak pinaagi sa paglabay niini sa bintana apan napugngan kini sa mga kabanay sa biktima.
Matod pa niya nga aduna siyay sakit sa pangisip ug kanunay siya nga nakasinati og nervous breakdowns, apan iyang gihimakak ang pasangil nga tiggamitan siya og ilegal nga drugas.
Bisan pa sa gihimo sa suspek, naghatod gihapon og pagkaon ang pamilya sa biktima ngadto sa suspek tungod kay walay paryente ang suspek dinhi sa Sugbo.
Kasamtangang gikustodiya sa Sawang Calero Police Station ang suspek samtang gipaabot pa sa kapolisan ang pormal nga pagpasaka og kaso batok kaniya.
