(Hulagway ni Bombo Lahvi Quiñones)
CEBU CITY – Gipusil-patay ang usa ka gituohang notadong snatcher atubangan sa usa ka fastfood chain kagabii sa dalan Colon, dakbayan sa Sugbo.
Nahagba ang biktima nga si Gerald “Dodoy” Villamor, 20 anyos, ug lumulupyo sa Brgy. Bulacao Pardo sa nahisgutang syudad.
Matud sa hepe sa Carbon Police Station nga si Major Randy Caballes nga gipusil sa wala mailhing riding-in-tandem Dodoy nakahiagum kini og samad pinusilan sa iyang likod.
Nakahigayon og dagan ang biktima apan nahagba kini pag-abot sa usa ka fastfood chain.
Dugang pa ni Caballes nga personal grudge ang nakita motibo sa hinanaling kamatayon ni Dodoy ug posibleng kauban ra ni Dodoy ang nagbuhat niini.
Narekober sa kapulisan ang 3 ka kabhang ug 1 ka buhing bala sa kalibre 45 nga armas.
Pagkalabay sa pipila ka minutos, mitumaw usab ang laing insidente sa pagpamusil sa dalan Manalili sa susamang dakbayan.
Matud sa hepe sa Waterfront Police Station nga namatay sa maong pagpamusil ang biktima nga si Jay Bulaong Caruana, 28 anyos.
Padayon pang gisuta sa mga sakop sa Waterfront Police Station ang motibo niini.
Dugang pa ni Major Pomarejos nga posibleng adunay koneksyon ang sunud-sunod nga pagpamusil kagabii sa dakbayan sa Sugbo. (FDP/GN)
