ARGAO, CEBU-Nakugang ang mga lumulupyo sa Barangay Langtad sa lungsod sa Argao sa habagatang Sugbo human nga adunay usa ka lalaki ang mikatkat sa tower sa kuryente nga gipanag-iya ug gidumala sa National Grid Corporation of the Philippines (NGCP) sayo sa kabuntagon niadtong Disyembre 28, 2024.
Usa ka concerned citizen ang mitaho sa mga kapulisan sa naasoy nga lungsod og nangayo’g tabang aron marespondihan ang panghitabo.
Dali sab nga miresponde ang mga awtoridad sa kagamhanang lungsod sa Argao lakip na sa Municipal Disaster Risk Reduction and Management Office (DRRMO) niini aron i-rescue ang maong lalaki.
Pasado alas 4:50 sa sayong kabuntagon na nakanaug ang maong lalakig ug daling gidala sa pinakaduol nga tambalanan sa nasangpit nga lungsod.
Nasuta nga lumulupyo ra sab sa maong dapit ang maong lalaki og padayon pang gisuta ang hinungdan ug rason ngano nakahinayak kining mikatkat sa delikadong Tower sa kuryente.
