CEBU CITY – Nabalhog sa prisuhan ang usa ka high-value-target nga drug personality human kini nakuhaan og dul-an P3-milyones nga kantidad sa shabu atol sa buybust operation sa Sitio Lahing-Lahing II, Brgy. Mabolo, dakbayan sa Sugbo.
Gisikop sa mga sakop sa City Intelligence Branch (CIB) ang subject nga si Marvin “Ogis” Saberon, 32 anyos, ug nagpuyo sa nahisgutang dapit.
Nakuhaan si “Ogis” og 430 grams nga “white crystalline” ug “low-grade brown” nga shabu (kon shabu nga wala pa maluto pag-ayo) ug mikantidad kini og P2.9 million.
Matud ni Police Corporal Alsendor Sueco sa CIB nga taud-taud nang nalambigit sa maong negosyo si “Ogis” ug nagagikan sa iyang amo ang nasakmit nga shabu.
Dugang pa ni Sueco nga ila pang gi-validate ang pamahayag sa dinakpan mahitungod sa source sa shabu sa dili pa mopahigayon og follow-up operation.
Pasakaan si “Ogis” og kasong kalapasan sa RA 9165 kon Comprehensive Dangerous Drugs Act of 2002.
