Napalgang wala nay kinabuhi ang lawas sa usa ka lalaki sa baybayon sa Quirino North, Barangay Tabunok, lungsod sa Tabuelan sa amihanang Sugbo pasado ala 1:30 sa hapon niadtong adlaw sa Biyernes, Hulyo 4, 2025.
Sumala sa inisyal nga kasayuran nga nakuha sa Tabuelan Police Station nga ang mga residente sa maong dapit ang unang nakadiskobre sa maong patayng lawas sa diha pa nitaho kini sa ilang istasyon.
Sa pagkakaron wala gihapon pa mailhi ang biktima nga aduna lay pagbana-bana nga nagpanuigon kini sa 50-anyos og walay mga samad o timailhan sa foul play ang nasuta.
Nagsul-ob ang maong lalaki og itom nga slacks, itom nga loafer-style nga sapatos, ug drifit-type nga polo shirt nga adunay logo sa “DENR” ang wala nga bahin sa dughan.
Ipaubos kini nila sa autopsy ang maong patayng lawas nga kasamtangang ana sa Astro Funeral Homes sa samang dapit ug giawhag sa kapulisan ang publiko nga ilhin kini aron mapaabot sa tagtungod ang patayng lawas niini.
