Nadakpan na ang lalaki nga gitumbok sa kasong attempted rape, robbery, ug physical injury batok sa usa ka 20-anyos nga babaye sa dakbayan sa Lapu-Lapu niadtong kaadlawon sa Biyernes, Septiyembre 12, 2025.
Gipahibalo ni Lone District Representative Junard “Ahong” Chan ang iyang personal nga pakig-estorya sa suspetsado, nga mitug-an nga misulod siya sa balay sa biktima aron untang mangawat sa cellphone niini samtang natulog.
Matud sa suspek, wala siya’y intensyon nga manglugos, apan iyang giangkon nga iyang gibunalan og gahi nga butang ang ulo sa dalagita nga maoy hinungdan sa grabe nga samad ug pagdugo.
Sa imbestigasyon sa kapulisan, pasado alas-1 sa kaadlawon misulod ang suspetsado sa balay sa biktima pinaagi sa bintana. Sa pagduda nga wala kini molihok, gisulayan niya kini og paglugos, apan misukol ang dalagita, hinungdan nga nasamdan kini sa lain-laing parte sa lawas.
Matud pa ni Chan, ang kasong giandam batok sa suspetsado Robbery, attempted rape, ug physical injury.
Gipasalig sa kongresista nga suportado sa iyang buhatan ang kapulisan aron masiguro nga makab-ot ang hustisya para sa biktima ug mapanubag ang suspetsado sa iyang mga sala.
