CEBU CITY-Atake sa kasingkasing, ug dili tungod sa pinaakan sa iro, maoy hinungdan sa kamatayon sa 63-anyos nga si Jorge Mayol kinsa napalgang patay sulod sa iyang payag sa dakbayan sa Talisay niadtong Septiyembre 28, matod ni Mayor Samsam Gullas.
Dugang sa Mayor, nga nakadawat kini sa opisyal nga death certificate ni George Mayol ug Base sa death certificate, namatay si Mayol tungod sa atake sa kasingkasing.
Gumikan niini, ang acting City Veterinarian, nga si Dr. Hope Dejadena, mumubo sa observation period alang kang Spike, ang iro nga nahisgutan.
Gilauman sa sulod sa semana, nga human sa panahon sa obserbasyon, si Spike andam na alang sa pagsagop.
Matud ni Gullas, nga dili na niini dugayon tungod kay klaro nga makita sa death certificate, nga dili siya namatay sa iro kondili tungod sa atake sa kasingkasing.
Matud ni Dr. Dejadena nga plano niya nga buhian si Spike alang sa adoption karong Huwebes ning semanaha tungod kay mao usab kini nga adlaw nga mahuman ang 10 ka adlaw nga observation period.
Dugang pa, nga si Spike walay timailhan o sintomas sa rabies.
Gawas ni Spike, adunay lima ka iro uban niya nga andam usab nga i-adopt.
