CEBU CITY-Wala makit-an nga ‘razor’ kun pang-ahit ang hinungdan sa kamatayon sa usa ka 53 anyos nga lalaki sa Basdiot, lungsod sa Moalboal, probinsiya sa Sugbo.
Giila ang biktima nga si Alberto Laotosa, ulitawo, ug nagpuyo sa naasoy nga dapit.
Sa pakighinabi sa Bombo News Team kang Police Corporal Ronel Quinain sa Moalboal Police Station, gisaysay niini nga base sa ilahang mga impormasyon nga nakuha gikan sa mga kabanay, nagpangita sa iyahang ‘razor’ ug pang-ahit ang biktima apan gumikan kay wala niini makit-an nagpakamatay kini.
Matud pa nga nabantayan sa mga kabanay, ingon man sa mga silingan nga hilabihan ang kaguol sa biktima, ug buntag na sa dihang ilahang napalgan nga nagbitay na ang patay’ng lawas niini gamit ang habol.
Hinuon, wala’y nakitang foul play ang kapulisan sa maong insidente.
Nasayran usab nga adunay deperensya sa pangisip ang maong biktima. | GN
