PROVINCE OF CEBU-Nakaplagang patay ang usa ka 49-anyos nga lalaki nga Person with disabilities, human gianod sa baha sa Sityo Tabay,Barangay Adlaon Cebu.
Giila ang biktima nga si Roberto Codilla Bontuyan, sumala sa iyang pag-umangkon nga si Jerome Bontuyan, katapusan nilang nakit-an ang iyang uyoan pasado alas 6 sa buntag diin nagkuha kini og tubig sa atabay daplin sa sapa ug pipila lang ka mga oras ang nilabay mibunok ang kusog nga ulan.
Naalarma na ang pamilya niini pagkahapon ug wa gihapon nila makita ang biktima hinungdan nga ila kining gipangita sa dapit diin siya kataposang nakit-an apan ang iyang tsinelas ra ang naa sa kilid sa atabay.
Nakurat ang pamilya, human nag-viral ang post sa usa ka Concern Citizen mga alas 5:00 sa hapon nga nakakita sila og lawas nga naglutaw sa sapa sa Lungsod sa Compostela, Cebu, 24 ka kilometro ang gilay-on gikan sa ilang barangay.
Sa pagkakita nila sa mga hulagway ilang gikompirmar nga kadto iyang uyoan.
