Giakusahan ang usa ka Italyanong lalaki og pension fraud human kini nasakpan nga nagpaka-aron ingnon nga iyahang anhing inahan samtang nag-renew kini sa ID Card aron padayong makadawat og pension.
Ang 57-anyos nga unemployed male nurse kay nagsul-ob og disguise ala-hulagway sa iyang inahan nga namatay na aron iproseso ang renewal sa ID Card niini para padayon ang kwarta maabot.
Gituohan sa mga awtoridad nga ang inahan namatay sa edad nga 82-anyos sa lungsod sa Borgo Virgilio diin wala gideklarar sa iyang anak ug gitago pa ang patayng lawas sa ilang panimalay sulod na sa tulo ka tuig aron dili maputol ang paglukat sa pension.
Apan sayo rong buwana nasakpan na sa iyang modus ang lalaki human nagmaneho padulong sa registry office nga sul-ob ang sinena, alahas, ug make-up sa iyang mama nga mura hinuon og kataw-anan.
Sa dihang gidakop na kini, gironda sab sa mga awtoridad ang panimaly niini diin nakit-an ang gitagong mummified body sa inahan sulod sa gamayng cabinet nga gilukot sa duha ka sleeping bags.
Ang kahanas isip nurse ang nahimong kaabag niini sa pagtago sa iyang inahan.
Ingon man ang lalaki kay mag-atubang karon sa kasong pension fraud ug concealing a dead body gawas sa uban pang kasong ipasaka.
