Sugdan na karong Lunes sa buntag, Marso 23, 2026, ang pagpatuman sa programa sa kagamhanan sa Siyudad sa Talisay nga “Libreng Sakay” alang sa mga trabahante ug mga estudyante nga nagbiyahe padulong sa Siyudad sa Sugbo.
Gipahibalo ni Mayor Gerald Anthony “Samsam” Gullas Jr. nga kini nga inisyatibo gihimo aron matabangan ang mga Talisaynon nga makaibot sa ilang adlaw-adlaw nga galastohan sa pampublikong sakyanan, ilabi na nga nagpadayon ang pagsaka sa presyo sa gasolina tungod sa krisis sa Middle East.
Sa pagkakaron, duha ka buses ang gamiton alang sa maong programa tungod kay ang ubang sakyanan sa siyudad gigamit pa sa mga atleta sa CVRAA.
Apan gipasalig sa mayor nga human sa maong kalihokan, dugangan kini og laing duha ka bus ug upat ka L300 vans pagsugod sa sunod semana aron mas daghan pa nga pasahero ang makapahimulos.
Mao kini ang mga rota sa Libreng Sakay (Lunes hangtod Biyernes):
Route A (City Hall to E-Mall via N. Bacalso Ave):
-Pick-up points: City Hall, Wilcon Hardware, Old Centennial Hardware (Mananga Bridge), BDO (atbang FUS), ug Gaisano Tabunok Loading Bay.
-Drop-off: E-Mall.
Route B (City Hall to Plaza Independencia via Cebu South Coastal Road):
-Pick-up points: City Hall, Loading Bay (in front of City Hall), YASCO (San Isidro Junction), Star Oil (Uldog Junction), Maglasang, Cansujong waiting shed, RedDoorz (Jollibee) Rabaya Junction, ug Petron (Laray Junction).
-Drop-off: Malacañang sa Sugbo ug Plaza Independencia (atbang Land Bank).
Sa pagkakaron, one-way ride pa lamang ang ipatuman samtang padayon ang assessment sa sistema sa siyudad, uban ang tumong nga mahimo kining two-way ride sa umaabot nga mga adlaw. Gipahibalo usab sa mayor nga gihan-ay na ang mga guidelines aron masiguro ang hapsay ug patas nga implementasyon sa programa alang sa tanan.
