CENTRAL VISAYAS- Gibawal sa Land Transportation Franchising and Regulatory Board-7 ang pagpabayad ug doble sa mga plus-size nga mga pasahero, kini human nga adunay pipila ka mga nadawat nga mga reklamo sa kaulohan gikan sa mga pasahero nga gipayad sila og doble.
Gibutyag ni LTFRB-7 Regional Director Eduardo Montealto Jr. nga ang maong pagpabayad ug doble sa mga nahisgutang mga pasahero, usa ka diskriminasyon ug gidili kini sa bisan unsang panahon.
Matud ni Montealto, ipatawag sa buhatan ang mga driver nga magpabayad ug doble ug hilabi na nga magpakanaog sa maong mga pasahero.
Gihimug-atan usab niini nga isyuhan gayud ug show cause order ang maong mga driver, konduktor ug hilabi na ang operator ug pamultahon ug 5,000 ngadto na sa 15,000 sa una ug ikatulo nga offense niini ug posible nga masuspinso ang mga unit niini ug 30-ka adlaw plus impoundment nga 50-ka adlaw ug posibleng rebokasyon sa prangkisa niini.
Gipasabut usab niini nga ang numero unong huna-hunaon dapat dili ang makuha nga ginansiya, sanglit serbisyo sa mga katawhan. | via Bombo Nathaniel Sandoval
