Gipahibalo sa Department of Agriculture (DA) ang ilang plano nga maglunsad og Command Center karong Nobiyembre, nga nagtumong sa pagpalambo ug pagpahapsay sa pagdumala sa food supply chain sa tibuok nasod.
Matod ni Agriculture Secretary Francisco Tiu Laurel Jr., ang Command Center nga itukod magsilbing digital nerve center, diin pinaagi niini, ang lain-laing klase sa datos nga may kalabotan sa agrikultura ug suplay sa pagkaon ang hiniusang kolektahon ug analisahon.
Kini nga mga datos naglakip sa impormasyon sa produksyon sa pagkaon, ang gidaghanon sa imported nga mga produkto, ang kasamtangan nga kahimtang sa stock nga lebel, mga presyo sa palaliton, ang lebel sa konsumo sa mga lungsoranon, ang kapasidad sa post-harvest nga mga pasilidad, ang kasangkaran sa irigasyon, ug bisan ang global nga mga uso sa merkado nga nakaapekto sa sektor sa agrikultura.
Sa sinugdan, ang nag-unang focus sa Command Center mao ang rice value chain, kini tungod kay ang bugas gikonsiderar nga nag-unang pagkaon sa nasud, busa importante nga masiguro ang igong suplay ug makontrol ang presyo niini.
Matod sa DA, ang mas epektibong forecasting nga nahimo sa Command Center, uban sa pagbalik sa regulatory powers ngadto sa DA ug sa National Food Authority (NFA) ubos sa pag-amendar sa Rice Tariffication Law, makatabang sa pagpugong sa kalit nga pagsaka sa presyo sa bugas, ug gilauman usab nga maprotektahan ang kita sa mga lokal nga mag-uuma.
Ang modelo sa Command Center dili limitado sa bugas. Giplano usab kini nga gamiton sa ubang importanteng sektor sa agrikultura, sama sa mga high-value crops, kahayupan, manok, ug pangisda.
