Gibuhian na gikan sa kustodiya sa National Bureau of Investigation (NBI) ang online media personality nga si Franco Mabanta ug upat pa ka tawo human sila nakapiyansa niadtong Sabado.
Gipagawas sa Pasig Regional Trial Court Branch 167 ang release order human makapiyansa si Mabanta ug ang iyang mga kauban og P120,000 matag usa alang sa kasong robbery extortion.
Sumala sa korte, gihimo ang sesyon niadtong Sabado subay sa memorandum nga gi-isyu sa executive judge sa Pasig RTC niadtong 2025 nga nagtugot sa pagproseso sa pipila ka urgent nga legal nga kaso bisan adlaw nga walay regular nga sesyon.
Kahinumduman nga gidakop sa NBI si Mabanta pinaagi sa entrapment operation may kalabotan sa giingong pagpangayo og dakong kantidad nga kuwarta gikan kang kanhi House Speaker Martin Romualdez.
Gihimakak ni Mabanta ang mga alegasyon ug giingon nga siya biktima sa usa ka setup.
