DAANBANTAYAN, CEBU– Gitigbas-patay sa usa ka mag-uuma sa lungsod sa Daanbantayan ang iyahang silingan nga babaye nga usa usab ka mag-uuma.
Nakugang mga mga lumulupyo sa Barangay Pajo sa samang lungsod tungod sa makapakuyaw nga nabuhat sa ilahang silingan nga udtong tutok niadtong adlaw sa Lunes Oktubre 7, 2024.
Matud pa sa mga kapulisan sa Daanbantayan Police Station, nga murag susama nga nasudlan og panuway ang suspek sa linuog nga mga krimen.
Giila ang suspek nga si Alfonso Tundag Jr. ug ang biktima giilang si Necitas Abing nga pulos lumulupyo sa Purok Manga 2, Barangay Pajo, lungsod sa Daanbantayan.
Subay sa inisyal nga imbestigasyon sa kapulisan sa maong panghitabo, nasuta nga gitigbas sa suspek ang biktima gamit ang 19-ka pulgada (19 inches) nga sundang.
Dugang pa sa kapulisan nga posibleng na-black out ang suspek tungod kay wala kini mohunong sa bangis nga pagpanigbas bisan patay na ang biktima.
Nasikop ang suspek pinaagi sa ‘hot-pursuit operation’ tungod sa taho nga adunay patayng lawas nga napalgan sa mao nga dapit.
Kasamtangang balhog sa prisohan sa Daanbantayan Police Station ang suspek, samtang nagpa-abot sa kasong iduso batok kaniya.
