CEBU CITY — Dako ang pasalamat sa mga kabanay sa chief officer nga si Eduward Sareno, kinsang na-rescue sa nitikya-ob nga barkong Gulf Livestock 1 sa kadagatan sa Japan.
Sa eksklusibong interview sa Bombo Radyo ngadto sa maguwang ni Eduward nga si Mesael Sareno, nagkanayon kini nga natingala ug nagpanghupaw ang gibati human masayud sa balita kabahin sa naunlod nga barko sa Japan niadtong Setyembre 2.
Emosyonal nga gibutyag ni Mesael, nga nasubo kini sa maong panghitabo samtang nagsakay kini sa usa ka tanker vessel.
Matud usab niini nga grabe ang kabalaka sa pamilya ni Eduward, kinsang lumad nga taga-Brgy. Lupa, Oslob, human nakabalita sa maong katalagman.
Wala usab maka-antus si Mesael sa nahimong kahimtang sa iyang manghud diin nangluspad kini human gi-rescue sa Japanese Coast Guard.
Dako ang pagtuo usab sa maguwang nga kayang luwason sa chief officer sa barko ang kaugalingon sanglit aduna kini kasinatian isip usa ka mananagat.
Nagpasalamat kini sa Ginoo sa ikaduhang kinabuhi nga gihatag sa iyang manghud. /GN
