CEBU CITY- Nagtingkagol nga wala makahibaw sa iyang salaod sa Mabolo Police Station ang usa ka mahuyang human nga gipasanginlan nga nakaangol sa usa ka Chinese National pasado alas 11 sa gabie kagahapon didto sa usa ka hotel sa Brgy Mabolo, Cebu City.
Ang mao nga mahuyang nailhan sa pangan nga si alyas “Miya”, 24 anyos, ug usa ka miyembro sa LGBTQ+ community. Samtang ang reklamante nga Chinese National mao si alyas “Zilong”, 31 anyos, minyo, ug usa ka estudyante sa usa sa mga English as Second Language School diri sa Dakbayan sa Sugbo.
Base sa initial nga imbestigasyon, girespondehan sa mga sakop sa Mabolo Police Station ang tawag gikan sa frontdesk sa usa ka hotel sa F. Cabahug St. habig sa Brgy. Mabolo human nga mireklamo sa ila ang Chinese National nga si “Zilong” nga ang mahuyang nga si “Miya” maoy naka piit sa tudlo niini sa pultahan sa sa ilang pag check in. Mipasangil pud ang mao nga Tsino nga mikuha si “Miya” ug kwarta sa pitaka sa mao nga langyaw.
Apan mihimakak si “Miya” sa mao nga pasangil diin matud pa niya nga nagkaila sila sa mao nga langyaw sa usa ka “online dating app” diin sila nagkasabot nga mag check in aron makighilawas.
Sa dihang nahuman kini, nausab ang kinaiya ni “Zilong” misuway kini sa pagpugong sa mao nga mahuyang sa paggawas sa mao nga lawak ug misukmag pa kini sa baba ni “Zilong”.
Apan misuway sa pag ikyas ang mao nga mahuyang sa mao nga lawak ug sa ilang pagdinuotay sa pultahan, napiit ang tudlo sa mao nga Chinese National hinungdan sa pagdugo niini.
Daling minaog ang duha padung sa frontdesk ug wala niya damha nga gireklamo na diay siya sa mao nga langyaw.
Gipaabot sa Mabolo Police Station nga moreklamo ug kasong “physical injuries” ang mao langyaw nga si “Zilong” batok kang “Miya”. Samtang, andam pud nga mosang-at ug kontra reklamo si “Miya” batok sa mao nga Chinese National. |Bombo Rexmond Omega
