BOMBO EXCLUSIVE: Gipasabot ni Atty. Rameses Victorious Gatchalian Villagonzalo, usa ka ICC-accredited lawyer, nga walay legal nga awtoridad si kanhi Senador Antonio Trillanes IV sa pagpatuman o pag-implementar sa giingong warrant of arrest nga giisyu sa International Criminal Court (ICC) batok kang Senador Ronald “Bato” dela Rosa.
Ang pahayag gihimo ni Villagonzalo human makita si Trillanes sa Senado nga nagpakita sa giingong ICC arrest warrant atol sa tensyon ug kalibog kabahin sa posibleng pagdakop kang Dela Rosa.
Matud sa abogado, bisan pa og adunay kopya sa maong warrant si Trillanes o bisan kinsang pribadong indibidwal, wala kini maghatag kaniya og legal nga gahum aron mopatuman sa maong mando o mag-aresto sa senador.
Gipasabot ni Villagonzalo nga ang pagpatuman sa international arrest warrant kinahanglan pinaagi lamang sa mga otorisadong law enforcement agencies sama sa Interpol ug National Bureau of Investigation (NBI), uban sa pormal nga koordinasyon sa gobyerno ug mga implementing authorities.
Dugang pa sa abogado nga posibleng simboliko lamang ang gihimong pagpakita ni Trillanes sa dokumento isip tubag sa kaniadtong mga hagit ni Dela Rosa nga “mokuyog sa pag-serve sa warrant,” ug dili kini mahimong legal nga basehan aron personal niyang ipatuman ang maong mando.
Sa mga report, giingon ni Trillanes nga anaa siya sa Senado aron ubanan ang mga otoridad human siya hagiton ni Dela Rosa nga mokuyog sa pagserbisyo sa warrant. Gipakita usab niya sa media ang giingong ICC warrant ug miingon nga anaa sa lugar ang mga ahente sa NBI aron mopatuman niini.
Apan sumala kang Villagonzalo, ang legal nga proseso sa implementasyon sa usa ka ICC warrant lahi sa ordinaryong domestic arrest procedures tungod kay kini nagkinahanglan og international coordination ug pagsunod sa established protocols tali sa ICC, Interpol, ug local authorities.
Gipasiugda usab niya nga hangtod karon wala pay lokal o domestic warrant of arrest nga giisyu sa mga korte sa Pilipinas batok kang Dela Rosa, busa lahi ang legal nga kahimtang niini sa local ug international jurisdiction.
