Nisulpot karon ang impeachment complaint batok kang Presidente Ferdinand Marcos Jr., diin pipila ka mga nagkadaiyang grupo ang nipasaka niini batok kaniya.
Lakip na ang Makabayan Bloc, ug sa gikabutuyag ni Jaime Paglinawan, ang Chairperson sa Bayan Central Visayas, ang impeachment nga nitumaw karon subay sa panawagan nila nga ang tanang personahe nga nalambigit sa pagpangawkaw sa panudlanan sa nasud, nagsubay usab sa ilang panawagan nga angayan lang kining manubag.
Sa ekslusibong pakighinabi sa Bombo Radyo Cebu newsteam kaniya, gidugang ni Paglinawan nga ang kadaghanan nasayud nga ang Presidente mao ang nagpirma sa tanang budget nga nilusot sa nasud sukad tuig 2023 hangtud sa kasamtangan, hinungdan nga may kalabotan kini sa padayong korapsyon sa nasud.
Samtang, gitataw usab ni Paglinawan nga kung ang impeachment complaint kay na endorso na sa usa ka miyembro sa lower house, nagpasabot kini nga aprobado na.
Dugang pa nga lakip sa lakang mao nga ang secretary general ang magsilbing modawat sa maong reklamo, nga nagpasabot nga bisan giingong nibalibad ang staff sa opisina sa secretary general apan gibinlan sila sa kopya, na-comply gihapon ang lagda nga tagaan og kopya sa reklamo ang opisina sa secretary general.
Gipasabot usab ni Paglinawan kabahin sa giingong nadugay dyutay ang pagduso sa Makabayan Bloc sa maong reklamo, diin matod niya, gikinahanglan nga tun-an ang impeachment complain ug adunay lig-on nga basihanan.
Ingun man matod niya, walay lakang nga gikinahanglang mag inunhanay og sumite sa mga reklamo.
