Ilusad sa Malacañan ang nagkalain-laing aktibidad alang sa pagsaulog sa Independence Day karong Hunyo 12, 2024.
Sa pahibawo sa Presidential Communications Office (PCO), sa umaabot nga Hunyo 10, Lunes, ang unang adlaw sa “Musikalayaan” concert nga ipahigayon sa Rizal Park, diin tampohan ang nagkadaiyang mga artista sama sa banda nga “Rocksteddy”.
Molungtad ang “Musikalayaan” hangtod Hunyo 12, diin mopasundayag usab ang sikat nga P-Pop Girl Group nga “BINI”.
Sa umaabot Lunes, ilusad usab ang programang “Klinikalayaan 2024: Health services para sa katawhan” sa dancing fountain area sa Luneta, ug diin adunay libreng dental, optical, ug uban pang serbisyong medikal.
Ipahigayon usab ang “A-tapang A-tao Chili festival” nga eksibit ug pagbaligya sa nagkalain-laing mainit nga sarsa, sili, ug uban pang produkto sa sili gikan sa Philippine Chili Federation.
Sa mismong Independence Day karong Hunyo 12, Miyerkules, ipahigayon ang “Parada ng Kalayaan” sa Quirino Grandstand nga adunay parada sa militar ug mabulukon nga mga float nga magrepresentar sa mabulukon nga kasaysayan sa Pilipinas.
Gipaabot usab nga mosalmot sa maong mga kalihukan ang pipila ka dagkong opisyal.
