Giklaro sa Malacañang kalabot sa Muslim holiday karong adlawa, Enero 27 isip pagsaulog sa Isra Wal Miraj, o ang Night Journey and Ascension of the Prophet Muhammad.
Gikompirmar ni Executive Secretary Lucas Bersamin nga ang holiday kay gipatuman lamang sa Bangsamoro Autonomous Region in Muslim Mindanao (BARMM) ug uban pang designated Muslim areas sumala sa Muslim Code.
Samtang sa National Capital Region (NCR), gitugotan ang mga Muslim nga dili motrabaho.
Gibase ang holiday sa Muslim Personal Laws, partikular na Article 169 sa Presidential Decree No. 1083 nga gipasa niadtong 1977 diin naila usab kini sa Civil Service Commission (CSC) Resolution No. 81-1277 nga gi-isyu niadtong 1981.
Ang Isra Wal Miraj usa ka importante nga panghitabo sa Islam nga nagtimaan sa journey ni Propeta Muhammad gikan sa Mecca ngadto sa Jerusalem (Isra) ug sa iyang pagkayab sa langit (Miraj) sa usa ka gabii.
Ingon man nga lakip sa naasoy nga obserbasyon kay ang espesyal nga mga pag-ampo, pagpamalandong sa Quran, ug pagpasalamat sa espirituhanong kahulogan niini nga panghitabo.
Bisan og dili kini nasudnong holiday, ang pagsaulog sa Isra Wal Miraj sa Enero 27 importante sa pagtuo sa mga kaigsoonang Muslim, nga giila sa pipila ka rehiyon basi sa balaod sa Pilipinas.
