Dili manghilabot ang Malacañang sa hangyo og asylum ni Atty. Harry Roque sa Netherlands.
Matod ni Palace Press Officer Claire Castro, mohimo lang og aksyon ang Palasyo kung mapasakaan og kaso ug kon adunay warrant of arrest batok kang Roque.
Una nang nagduda ang Palasyo nga mahatagan dayon og asylum si Roque tungod sa pagtuo nga maglisod siya sa pagmatuod nga adunay political persecution kaniya sa Pilipinas.
Samtang, gitambagan sa Malacañang si Roque nga depensahan una ang kaugalingon kaysa sa ubang tawo.
Kini ang reaksyon sa Palasyo human gipangayoan og reaksyon kalabot sa hangyo ni Roque og political asylum sa Netherlands, nunot sa plano sa Makabayan bloc nga babagan ang hangyo sa kanhi presidential spokesperson.
Matud sa opisyal nga tungod kay dili na man sakop si Roque sa legal team ni kanhi Presidente Rodrigo Duterte, alang sa kaso nga iyang giatubang sa International Criminal Court (ICC), wala na siyay rason nga magpabilin sa Netherlands.
Hinungdan nga kinahanglan na niini nga mobalik sa Pilipinas ug motutok sa pagdepensa sa iyang kaugalingon batok sa mga reklamo nga gipasaka batok kaniya.
