Gipasalig sa Palasyo sa Malacañang nga wala nay dugang paglahugay sa pagpuno sa mga posisyon sa gabinete.
Kini human miingon si Palace Press Officer USec. Claire Castro nga ang mga ngalan sa mga kalihim sa nagkalain-laing departamento isumite na sa Commission on Appointments (CA).
Sumala ni Castro, si Presidente Ferdinand Marcos Jr. mismo ang nagmando nga isumite ang mga ngalan sa CA sa labing madali nga panahon.
Una nang gisaway ni Senador Rodante Marcoleta ang pagpadayon sa kadaghanan sa mga head sa mga ahensya sa gobyerno sa “acting capacity”.
Lakip sa mga ahensya nga gihisgutan ni Marcoleta sa iyang privilege speech sa Senado mao ang: Office of the Executive Secretary, Department of Finance, Department of Public Works and Highways, Department of Justice, Department of Budget and Management, Department of Environment and Natural Resources, Department of Transportation, ug Presidential Communications Office.
Mahitungod kang DENR Secretary Raphael Lotilla, miingon ang Palasyo nga una nilang tan-awon ang iyang rekord, ilabi na nga ikatulong higayon na nga ang iyang appointment gi-bypass sa Commission on Appointments.
