Giwagtang sa Malacañang ang mga kabalaka sa publiko bahin sa posible nga pag-atake sa Taiwan taliwala sa mga ehersisyo militar sa China sa palibot sa Taipei.
Matod ni Palace Press Officer Undersecretary Atty. Claire Castro nga wala’y angay kabalak-an ang publiko bisan pa sa panawagan ni AFP Chief of Staff General Romeo Brawner Jr.
Dugang ni Castro nga angayan lang nga mohatag og pahinumdom si Brawner sa mga sundalo ug bisan sa katawhan.
Dugang pa ng opisyal nga kinahanglang mangandam usab ang gobyerno sa tanang contingencies kalabot sa maong butang.
Sa laing bahin, gitugyan na usab sa Palasyo ang ubang mga detalye kalabot sa mga contingencies nga ipatuman, ilabina ang posibleng pagpauli sa mga Filipino sa Taiwan, ngadto sa Department of National Defense (DND) ug Armed Forces of the Philippines (AFP) apan mipasalig kini nga andam ang gobyerno sa pagpauli sa mga kababayan sa nasud.
Gipasalig usab ni Castro nga kung mahitabo ang gikahadlokang pagsulong o pag-okupar, andam ang gobyerno nga motabang sa atong mga kababayan sa Taiwan.
Nanawagan usab si Castro sa atong mga kababayan ilabi na sa Taiwan nga magpabiling kalmado tungod kay andam ang gobyerno sa pagtabang kanila bisan unsang orasa.
