NEGROS ORIENTAL- Gumikan sa away magtiayon hinungdan nga gipusil sa usa ka security guard ang iyang kaugalingong anak ug ang iyang kaugalingon sa Purok San Roque, Barangay Buntis, siyudad sa Bacong sa Negros Oriental Huwebes, Disyembre 5, 2024.
Kini ang gikumpirma ni Police Major Vann Joel Tingson, ang hepe sa Bacong Police Station sa ekslusibong pakighinabi sa Bombo Newsteam kaniya.
Matod niya nga tungod kay adunay laing lalaki ang asawa sa suspek nga usa ka security guard, ang ilang panag-away misangpot sa pagsumbag sa suspek hinungdan nga nibiya kini sa ilang panimalay sa Barangay Bagacay sa dakbayan sa Dumaguete ug ang inahan ug anak nibalhin sa Barangay Buntis, dakbayan sa Bacong nga adunay Barangay Protection Order (BPO) nga gisang-at.
Base sa imbestigasyon, mga alas 10 ang takna sa buntag niadtong Huwebes, ang amahan miadto sa balay sa Barangay Buntis ug nangayog pagtugot sa iyang asawa nga makahulam sa ilang duha ka anak nga babaye nga nagpangidaron og singko ug tres anyos.
Apan, gibalibaran ang iyang hangyo.
Wala magdugay, nibunot ang amahan og kalibre 9mm ug gipusil ang tres anyos ug dayon ang singko anyos una gipusil ang kaugalingon.
Dead on the spot ang singko anyos nga bata ug ang amahan, samtang ang tres anyos gidali sa pagdala sa tambalanan gamit ang police patrol car ug didto namatay.
Maayo na lang kay nakalingkawas ang inahan gikan sa pagpusil sa iyang bana nga wala makaangkog samad.
