Gisugyot nga pagatukoron sa Barangay Looc sa dakbayan sa Mandaue ang bag-o ug permanente na nga campus sa Mandaue City College lakip ang bag-o sab nga Cebu Technological University – Mandaue sumala pa sa pasaad ni City Mayor Thadeo Jovito “Jonkie” Ouano.
Matod pa sa eksklusibong pakighinabi sa Bombo Radyo Cebu News Team kang Atty. Sally Malig-on, ang Mandaue City Administrator nga gilauman karon sa kasamtangang administrasyon ng pagpalambo sa City College sa dakbayan ug pagdugang ug CTU campus sa syudad alang sa mga kabatan-onang Mandauehanon.
Saysay pa niini nga ang konstruksyon sa pito ka andana nga Mandaue City College building kay gikatakdang sugdan sa sayong bahin sa tuig 2026 nga aduna pay phased plan nga magtugot sa mga estudyante ang mahuman nga mga lower floors samtang gitapos kini.
Sa susamang dapit sa Barangay Looc kay gitagana sab ang konstruksyon sa CTU Engineering Department.
Gani laing sugyot niini ang pagtukod sab og usa ka library aron makaserbisyo sa mga tinun-an sa ilang pagtuon.
Gibana-banang magbalor ang konstruksyon sa P500-milyones nga maka-akomudar sa kapin 5,000 ka mga estudyante.
