CEBU CITY – Napaabot na sa Mandaue City government ang ilahang financial assistance alang sa mga biktima sa linog sa North Cotabato ug Central Mindanao.
Personal nga gihatod ni Mandaue City Mayor Jonas Cortes ang P8 million ngadto na sa mga apektadong LGU ilabi na sa Makilala, North Cotabato ug Kidapawan City.
Gipahibalo ni Atty. Edu Ybañez, ang chief of staff ni Mayor Cortes, nga luwas silang naabot sa Mindanao ug nahatag na nila ang financial assistance.
Giingong luwas man nga kaagi-an ang mga kadalanan apan makita gayud ang kadaut nga mugna sa linog.
Matud pa nga gihatagan nila ang LGU sa Makilala ug Kidapawan ug tag-P2 million, samtang tag-P1 million ang uban pang mga apektado nga LGU.
Sigon pa nga gihimo nilang prayoridad ang Makilala ug Kidapawan gumikan kay mao kini ang duha ka mga lugar nga hilabihan gayud nga naapektahan sa linog.
Samtang, gihulagway ni Atty. Ybañez nga hilabihan gayud ang kadaut nga namugna sa sunod-sunod nga linog sa Mindanao ug gani ang municipal hall sa Makilala, North Cotabato ang dili na magamit gumikan kay nagusbat na kini ug anaa na lang sa gawas nagpadayon ang operasyon sa LGU diin nagpasilong na lang una sila sa tent.
