Nanghinaot si Mandaue City Mayor Jonkie Ouano nga dili makaapekto ang kabag-ohan sa bag-ong liderato sa Kongreso ug Senado sa gipangayo nga pundo sa mga proyekto sa dakbayan sa Sugbo ug Mandaue.
Mao kini ang iyang gipaambit, ingon man nga malaumon ang mayor nga dili maapektuhan hilabi na nga maayo ang tumong sa pagpangyo og pundo alang sa tukuron nga proyekto nga may kalabutan sa pagpugong sa grabeng pagbaha.
Apan, kon gani maapektuhan ug dili igo ang pundo, paningkamutan gihapon nila nga makatukod kay alang man kini sa mga konstituwente.
Dugang pa niini nga dili hinuon sila mag-agad sa pundo sa national inay pinaagi sa pasalig sa ubang opisyal sa dakbayan kay maduso nila ang plano nga proyekto.
Samtang, nagkasinabot na sila si Mayor Jonkie Ouano ug Cebu City Mayor Nestor Archival nga taoran og early warning system ang Butuanon River.
Kini aron malikay sa disgrasya ang mga lumolopyo nga anaa nagpuyo daplin sa maong sapa.
Ang early warning system anaay cctv cameras, siren ug mga personnel nga mo alarma sa katawhan sa panahon nga molapaw na ang tubig baha sa water level niini.
Tinguha sa maong duha ka Mayor nga kahatagan og solusyon ang problema sa matag higayon nga kusog ang ulan nga makahatag og perwisyo sa mga lumolopyo niini. | Bombo Crislee Adlawan
