Gibisita sa mga opisyales sa Kagamhanang Dakbayan sa Mandaue ang Integrated Waste Management Facility sa dakbayan sa Naga sa habagatang Sugbo niadtong Miyerkules, Enero 21, 2026.
Kini isip kabahin sa tinguha sa dakbayan nga makakita og epektibo ug maluntarong solusyon sa suliran sa basura sa dakbayan.
Gipangulohan ang pagbisita ni Mandaue City Mayor Thadeo “Jonkie” Ouano nga gihangop nila ni Naga City Administrator Engr. Arthur Villamor ug uban pa.
Nagtinguha kini sa inisyatiba sa padayon nga paningkamot nga makakita og pasilidad nga muproseso sa basura sa syudad human nagkasalimuang kini sa epekto sa pagsirado sa operasyon sa Binaliw landfill human sa nahitabong landslide niadtong Enero 8.
Nasuta atol sa pagbisita nga ang mga malata (biodegradable) nga mga basura kay pwedeng ma-convert isip renewable energy ug compost oganic fertilizers pinaagi sa pagproseso sa mga modernong makinarya ug generators sa nahisgutang pasilidad. Samtang ang mga dili-malata (non-biodegradable) nga mga basura kau mamahimong maproseso isip refuse-derived fuel nga magamit sa dagkong mga industriya ug kumpanya.
Subay niini, striktong gipatuman sa dakbayan sa Mandaue ang polisiya niini sa waste segregation sa tanang barangay aron mahapsay ang pagdumala sa mga basura.
