Gideklara ni President Ferdinand Marcos Jr. ang nasudnong state of calamity aron mapalambo ang koordinado nga tubag sa nasud human sa pag-igo sa Bagyong Tino ug sa gilaumang epekto sa umaabot nga Super Typhoon Uwan, karong Huwebes, Nobyembre 6, 2025.
Giaprubahan sa Pangulo ang rekomendasyon sa National Disaster Risk Reduction and Management Council (NDRRMC) atol sa usa ka situational briefing.
Base sa pinakabag-ong datos, milapas na sa 114 ang ihap sa mga nangamatay, samtang 127 pa ang gi-report nga nawagtang.
Kapin sa 1.9 milyon ka Pilipino ang naapektuhan sa bagyo, kasagaran sa Visayas.
Samtang nagbangon pa ang nasud sa kadaut nga gidala ni “Tino,” laing kusog nga bagyo ang naghulga nga moigo sa Pilipinas.
Ang PAGASA nagpasidaan sa Bagyong “Uwan”, nga karon nakit-an duol sa amihanan-sidlakang Mindanao, ug gibanabana nga mokusog ngadto sa usa ka super typhoon sa mosunod nga mga adlaw.
Gisusi na sa NDRRMC kung pila ka mga responder ang ipadala ngadto sa Luzon, apan si Marcos misiguro nga dili mobiya ang mga responder sa Cebu hangtod nga naplastar na ang mga Sugbuanon.
Sumala sa council, 10 hangtod 12 ka rehiyon sa nasud ang naapektuhan o posibleng maapektuhan sa duha ka bagyo nga mao na ang ikaduhang sunod-sunod nga kalamidad nga moigo sa Pilipinas sulod sa bulan sa Nobyembre.
