Nahimong sentro sa diskusyon sa social media si TV host Mariel Padilla human namatikdan sa pipila ka netizens nga wala na niya gi-follow sa Instagram ang mga aktres nga sila si Angel Locsin ug Anne Curtis.
Sumala sa pipila ka netizens, nawala sa following list ni Mariel ang duha ka aktres human mokuyanap ang mensahe ni Angel alang sa iyang bana nga si Senator Robin Padilla.
Nalambigit usab ang ngalan ni Anne Curtis human nagduda ang pipila ka netizens nga may kalabotan kini sa iyang komento sa post ni Angel nga adunay mensaheng, “Welcome back Mars, ay Darna pala,” isip suporta sa aktres.
Anaa sa sentro sa kontrobersiya si Angel Locsin human sa iyang gipagawas nga pahayag bahin sa iyang pagkadismaya sa pipila ka baruganan ni Senator Robin Padilla, lakip ang mga isyu sa red-tagging, iyang suporta kang Pastor Apollo Quiboloy, ug mga pahayag kabahin sa China ug West Philippine Sea.
Samtang, si Rommel Padilla, igsoon sa senador, daw mitubag usab human gi-share ang post sa usa ka netizen nga nagsaway kang Angel.
Sa pagkakaron, wala pa’y opisyal nga pahayag gikan nila Mariel Padilla, Angel Locsin, ug Anne Curtis kabahin sa giingong pag-unfollow sa Instagram.
