CEBU CITY – Gihimakak ni Mataas Na Kahoy, Batangas Mayor Janet Ilagan nga wala sila nakadawat ug tabang sa ilahang lugar.
Sa eksklusibo nga pakighinabi sa Bombo Radyo Cebu ni Mayor Ilagan, gibutyag niini nga nag-awas-awas ang ilahang nadawat nga hinabang, butang nga hilabihan niini nga gipasalamatan.
Matud pa sa mayor nga sukad niadtong unang adlaw nga miboto ang bulkang Taal hangtod niining adlawa, padayon ang pag-abot sa mga hinabang gikan sa nagkadaiyang Local Government Unit ug uban pang mga organisasyon.
Giingong ‘well-provided’ ang mga evacuees sa iyahang munisipalidad ug wala kini natala nga problema.
Hinuon, giangkon ni Mayor Ilagan nga bisan ug daghan silang mga tabang nga nadawat, wala sa gihapon kini masayod kung hangtod kanus-a ang krisis nga ilahang gi-atubang hinungdan nga padayon kining mi-apelar ug tabang sama na lang sa face mask, tambal, tubig, ug pagkaon.
Ang munisipalidad sa Mataas Na Kahoy sa probinsiya sa Batangas ang adunay 16 ka mga barangay ug 9 niini ang gipugos pagpahiklin ang ilahang mga residente.
Gisiguro usab sa mayor nga adunay mga pulis nga naka-deploy sa ilahang lugar arun nga dili na mubalik ang mga residente sa ilahang mga panimalay.
Nanawagan si Mayor Ilagan sa iyahang mga konstituwente nga musunod sa mga lagda arun nga malikay sa disgrasya.
