Nakasulod sa finals sa Britain’s Got Talent Season 19 ang Filipino singer nga si Matty Juniosa human niya nadawat ang iyang ikaduhang Golden Buzzer gikan sa mga hurado sa kompetisyon.
Sa semi-finals round, gipangangha ni Matty ang mga tumatan-aw ug mga hurado sa iyang kusganong pag-awit sa kanta ni Aerosmith nga “Dream On.”
Ang iyang pasundayag nakadawat og standing ovation gikan sa upat ka hurado, sila si Simon Cowell, Amanda Holden, Alesha Dixon, ug KSI, ingon man sa live audience.
Gidayeg usab ni Alesha ang Pilipinong mag-aawit, nga gitawag ang iyang pasundayag nga “effortlessly sensational” ug usa ka “masterclass” sa pagkanta.
Sa katapusan, si Amanda ang nagpindot sa Golden Buzzer, nga naghatag kang Matty og direktang tiket sa finals.
Mahinumduman nga si Matty nakadawat na kaniadto og Golden Buzzer gikan ni Simon atol sa iyang audition, nga nagdala kaniya sa semifinals.
Si Matty karon nagpuyo sa Glasgow, Scotland, diin siya nagtrabaho isip part-time waiter samtang aktibo usab nga nagpasundayag sa teatro didto.
