CEBU – Gihatagan og direktiba ni Cebu City Mayor Mike Rama ang City Health Office aron makigbatok sa dengue kung diin nagkasaka na ang kaso niini sa dakbayan sa Sugbo.
Tataw ni Rama, nga angayan na usab nga ipatuman ang 3 o’clock habit aron nga mangawagtang ang mga lamok nga nagdala og dengue sa tagsa-tagsa ka panimalay.
Dugang sa mayor nga gikinahanglan nga ipangyabo na sa katawhan ang mga tubig nga nagpondo gumikan posible kining himuong breeding ground sa mga lamok.
Tino ni Rama nga dako kaayo og papel ang usa ka limpyo nga palibot aron malikayan ang usa ka dengue outbreak maong awhag niini sa mga Sugboanon nga permanenteng manglimpyo og sigurohon ang pagguba sa mga posibleng puy-anan sa mga naasoyng insekto.
Nasayran nga niabot na sa 422 ang kaso sa dengue sa dakbayan sa Sugbo ug 13 na pasyente ang namatay.
