INDIA-Gikonsiderar nga usa sa labing gikahadlokan nga mananap sa tawo mao ang buaya.
Apan, usa ka makalilisang nga panghitabo ang nasinati sa siyudad sa Vadodara sa estado sa Gujarat sa India human gipang-atake sa mga buaya ang mga panimalay.
Kini human mi-awas ang suba nunot sa sunodsunod nga mga adlaw sa pagbunok sa ulan sa miaging semana.
Diin ang 17-kilometros nga gitas-on nga Vishwamitri River mao’y pinuy-anan sa gatosan ka buaya sa tab-ang nga tubig.
Naanad na ang mga tawo nga nagpuyo sa bukana sa suba nga adunay mga buaya nga mopaduol sa karsada panahon sa ting-uwan, apan lahi ang sitwasyon karong tuiga tungod kay gawas nga mas daghan, anaa kini sa mga residential areas.
Ingon man nga niadtong Agosto 27 ngadto sa 29, kapin sa 20 ang gidakop sa mga awtoridad samtang anaa sa mga balay.
Sukad sa miaging semana, halos walay tawo nga makatulog og maayo tungod sa mga buaya nga nagkamang sa karsada, nagsaka sa atop sa mga balay, naglangoylangoy sa mga kanal duol sa mga balay.
Hangtod karon, gipasidan-an ang katawhan sa hulga sa maong mga mananap samtang padayong gipangita sa mga awtoridad.
