Gipasabot sa Philippine Coast Guard ang nasigpatan nga mga Chinese militia ug fishing vessels sa Pag-asa island sa West Philippine Sea.
Sa press conference, si PCG spokesperson Commodore Jay Tarriela niingon nga ang kadaghan sa mga barko sa China nga nag-angkla sa isla tungod sa dili maayong panahon.
Bisan pa niini, ang opisyal sa PCG miingon nga ang padayon nga presensiya sa maong mga barko sa China sa kadagatan nagpabiling gikabalak-an.
Kalabot niini, si Comm. Tarriela, miingon nga sa bahin sa PCG ug sa suporta sa Armed Forces of the Philippines (AFP) kay ilang gihagit ang Chinese maritime militia vessels sa matag higayon nga mosulod sa territorial sea sa isla sa Pag-asa ug mopahibalo sa mga Chinese nga sila sakop sa teritoryo sa Pilipinas ug wala silay hurisdiksyon sa maong mga katubigan ug kinahanglang respetuhon nila ang soberanya.
Gihimo kini nga pamahayag sa opisyal sa PCG subay sa taho basi sa monitoring sa US maritime security expert Ray Powell nga ang gidaghanon sa Chinese militia ug fishing vessels nga nakitang nagtapok nga mikabat sa 83 kabuok.
Apan matod ni Tarriela, nius-os na ngadto sa 30 ang gidaghanon sa mga Chinese vessel, gahapong adlawa.
