THAILAND — Sulod sa usa ka tuig, moabot sa kapin 3,000 ka mga tawag ang nadawat sa usa ka fire station sa Bangkok apan dili tungod kay nagpatabang lang kung adunay miulbo nga sunog. Kun dili, tungod sa mga bitin nga anaa sa sulod sa panimalay.
Usa sa mga miresponde niini mao si Pinyo Pukpinyo diin daghang mga halas o bitin ang iyang nakuha gikan sa mga kabalayan sa ilang lugar.
Sa 16 ka tuig niini sa serbisyo, moabot na sa 10,000 ka mga bitin ang iyang nahipos.
Matud niini nga daghang mga balay sa Bangkok ang gironda ug gi-atake sa mga bitin nga nagtagu-tago sa mga kanal ug mikamang pa kini sa mga hardin hangtud na sa ilang inidoro.
Niadtong 2018, mipadayag ang disaster prevention officials nga nakadawat sila og 37,000 ka mga sumbong mahitungod sa mga bitin nga nakasulod sa panimalay.
Sa nakalabay nga buwan, gibana-banang anaa sa 100 ka mga halas nga nakasulod sa balay ang girespondehan sa mga bumbero sulod sa usa ka adlaw.
Kung hisgutan ang ilang tinuod nga trabaho, nakadawat ang mga kabumberuhan og alarma sa sunog kas-a o kaduha sa usa ka adlaw ug ila kining girespondehan.
Matud ni Pukpinyo nga sa halos 800 ka mga halas nga iyang nahipos, 70 porsyento niini ang walay la’ kon non-venomous. Apan nakadakop kini kas-a og cobra ug mga susama niini.
Gidala ang mga venomous snakes sa mga specialist institute aron makahimo og tambal nga pangontra sa ilang la.
Hinuon nalipay usab si Pukpinyo sa iyang pagdakop og bitin, gawas sa iyang duty isip bumbero ug usa ka bayani.
