Nipasalig ang bag-ong gitudlo nga Department of Public Works and Highways (DPWH) Secretary nga si Vince Dizon ang mga kontraktor nga mapamatud-an nga nalambigit sa ghost projects i-blacklist sa tibuok kinabuhi.
Gikanayon ni Dizon nga nangayo na siya og pagtugot ni Presidente Ferdinand R. Marcos, Jr. nga idili na hangtod sa hangtod ang mga pribadong kompanya nga nalambigit sa ilegal nga mga proyekto sa gobyerno.
Gidugang pa niini nga wala nay imbistigasyon batok sa maong mga peke nga mga kontraktor, kung mapamatud-an nga naglambigit sa ilegal nga kalihokan.
Gitaho usab niya nga ang Hepe Ehekutibo gikatakda nga magtukod og usa ka independent body aron imbestigahan ang mga iligal nga proyekto nga naglambigit sa mga kalihokan sa pagpugong sa baha.
Sa wala pa ang iyang bag-ong assignment, si Dizon maoy nangulo sa Department of Transportation sulod sa unom ka buwan.
Samtang, usa ka dakong overhaul nga naglambigit sa mga mahinungdanong opisyal ang ipatuman sa DPWH taliwala sa kontrobersyal nga pagdiskobre sa substandard ug ghost flood control projects.
