CEBU CITY- Nagtapok ang pipila ka mga grupo sa Duterte Diehard Supporters (DDS) sa Plaza Independencia sa Dakbayan sa Sugbo kagahapong adlawa, Huwebes, Hunyo 5, 2026, aron ipadayag ang ilang suporta sa padayong pagpahigayon sa pagdungog sa Senate Blue Ribbon Committee may kalabotan sa giingong flood control scandal.
Nagpahayag ang mga partisipante sa ilang kabalaka bahin sa bag-ong mga kalamboan sa Senado ug nanawagan alang sa accountability, transparency, ug fairness sa pagdumala sa mga isyu nga giatubang sa nasud.
Mibutyag si Jun Abines, Secretary General sa Cebu Alliance for Duterte, nga ang maong asembliya nagpakita sa sentimento sa mga tigpaluyo nga hugot nga nagbantay sa mga kalamboan sa nasudnong panggobyerno.
Matod ni Abines, ang ilang grupo nag-awhag sa mga magbabalaod nga sigurohon nga ang mga proseso sa Senado magpabiling patas ug naka-focus sa interes sa publiko. Gipasiugda usab niya nga ang mga kalainan sa politika dili angay makababag sa konstitusyonal nga mandato sa Senado.
Dugang pa niya nga ang mga partisipante sa panagtapok nanawagan alang sa panaghiusa ug hustong proseso samtang ang mga mahinungdanong isyu sa nasud padayon nga gidungog ug gihisgutan sa komitiba.
Samtang sa pikas bahin, si Moises Deiparaine, lider sa Duterte Riders, mipahayag nga usa sa mga hinungdan sa panagtapok sa mga DDS mao ang ilang pagsupak sa lakang sa bag-ong mayoriya sa Senado nga nagresulta sa pag-ilis sa liderato niini.
Gitambongan ang maong panagtapok sa mga miyembro sa mga grupo sama sa Maisog, Duterte Riders Team, Save the Philippines, Cebu Alliance for Duterte, ug The Muslim Community for Duterte. Mitambong usab si Michael Rama, kanhing mayor sa Dakbayan sa Sugbo, uban sa ubang mga organisasyon ug indibidwal nga nahiuyon sa mga baruganan sa DDS.
