Giawhag ni Cebu City Councilor Dave Tumulak, ang mga fraternity group sa Dakbayan sa Sugbo nga makig-alayon sa mga opisyal sa barangay sa Dakbayan alang sa pagpakigbatok sa mga hulga sa mga tunghaan.
Matud niini, dili angayang kahadlokan ang mga fraternity group, inay hatagan og respeto gumikan dako kini sila og tabang hilabi na kalinaw sa komunidad.
Kini human gideklarar nga walay face-to-face classes ang Don Vicente Rama High School ug Don Vicente Rama Elementary School human adunay giingong pagpamusil sa usa ka batan-on sa Basak San Nicolas niadtong Miyerkules, Agosto 19, 2026.
Gipahibalo kini ni Tumulak human personal niyang gisusi ang maong mga eskwelahan kagahapon sa buntag, Agosto 20. Tungod sa kalisang ug kabalaka sa mga ginikanan ug magtutudlo kalabot sa insidente, hinungdan nga gisuspenso ang face-to-face classes sa duha ka tunghaan.
AV_ DAVE TUMULAK, CEBU CITY COUNCILOR
Nasikop na usab ang giingong responsable sa insidente ug gikustodiya sa kapulisan sa Mambaling Police Station 11. Matod sa suspek, adunay siya’y personal nga kaaway nga iyang gisulayan og pusil apan wala maigo, ug iyang gipasiugda nga walay kalabotan ang maong insidente sa bisan unsang hulga batok sa mga eskwelahan.
Nanawagan si Konsehal Tumulak sa publiko nga dili magpakaylap og mga dili beripikadong impormasyon bahin sa mga hulga ug pirming susihon una ang tinubdan sa impormasyon, ilabina kon may kalabotan kini sa pagpanghulga.
