CEBU CITY-Giawhag sa Cebu City Health Department ang mga ginikanan nga pabakunahan ang ilang mga anak sa wala pa’y usa katuig ang ilang edad.
Mao kini ang awhag sa pangu sa CCHD nga si Dr. Daisy Villa arun masiguro nga mapanalipdan sa mga sakit sama sa tipdas, rubella, polio, diphtheria, tuberculosis, mumps, ug uban pa.
Ingon man nga gikasubo niini ang kapin sa 60 porsiyento sa target sa immunization sanglit ang ubang mga ginikanan nagduhaduha pa sa pagpabakuna sa ilang mga anak.
Asoy ni Villa nga ang immunization rate sa dakbayan sa Sugbo labaw sa 80 porsyento sa iyang unang duha ka tuig nga termino apan, tuig 2014 hangtud 2018, miubos kini sa 80%.
Giangkon usab sa eksperto nga usa sa mga hinungdan nga nagpanuko ang mga ginikanan sa pagdili sa pagbakuna sa ilang anak ang panghitabo sa hilabihan nga pagkamatay sa mga bata nga giingong gipasanginlan sa Dengvaxia vaccine.
Ingon man nga napakyas usab ang nasudnong kagamhanan sa hingpit nga pagpatin-aw sa ka-epektibo sa Dengvaxia vaccine ngadto sa mga ginikanan.
Hilabi na nga ang maong lakang, gidali-dali ug wala napasabot sa katawhan nga ang maong butang angay lang sa mga wala naigo sa sakit nga dengue.
