CEBU – Subay sa lakang sa kagamhanan sa dakbayan sa Sugbo mga matuman ang tinguha nga mahimong susama sa Singapore, gihingusgan karon kagamhanan ang problema sa mga nangatulog sa aseras.
Gitahasan ang Cebu City Anti-mendicancy Office (CCAMO) sa pagtubag sa dugay nang suliran sa kadalanan sa dakbayan ug kaabag niini ang City Environmental Sanitation Enforcement Team (CESET) ug Prevention, Restoration Order, Beautification, Enhancement (PROBE) Team, Department of Public Services (DPS) ug mga kapulisan .
Matag gabie adunay ipahigayon nga rescue operation ang mga hingtungdang aron matabangan ang mga pamilya uban sa ilang mga anak nga way laing kapaingnan.
Sa pakighinabi sa Bombo News Team sa usa sa mga matulog sa kadalanan sa dakbayan nga si Jordane Pascual, nagkanayon kini nga dugay na kining magtulganan sa aseras gani 23 ka tuig na kini nagpuyo sa dalan.
Matod pa ni Pascual nga hayahay ra ang matug sa kadalan ug gawas niini luwas sila sa bayranan kung ugaling mangabang og panimalay ilabi na nga wa silay trabaho ingon man maglisud sila sa pagpangita.
Gi-angkon usab niini nga dili kaayo kini uyon sa gihimong rescue operation sa mga buhatan sa City government gumikan bisan paman i-rescue sila maglisud gihapon sila ilabi na kung pagkaon ang hisgutan.
Hangyo nalang no Pascual nga kung ugaling ipdayon ni Cebu City Mayor Mike Rama ang iyahang gitinguha hatagan unta usab sila og permanenteng pinuy-anan ingon man makaon aron usab dili sila magutman.
